La editorial La Cruz de Grau y Xareos! Xestión Cultural tán acabante asoleyar el númberu 4 de la revista de lliteratura Formientu, una publicación que busca espublizar la obra de los autores más mozos de la lliteratura asturiana, dando a conocer a les nueves promeses de les nueses lletres.
Nel númberu cuatro vuelven a asoleyase les voces de munchos de los mozos escritores que yá vienen collaborando nel pasáu con Formientu, como Verónica Canel, Xaime Menéndez Llope, Héctor Pérez Iglesias, Ricardo Candás, Benxa Pérez, Elizabeth Felgueroso y Jorge Fernández García. Pero al mesmu tiempu síguense abriendo nueves siendes lliteraries con voces nueves nesta revista como les de Xurde Fernández, Inacio Rodríguez-Solar o Berto García, y con otres inédites dafechu, como les de Laura Marcos Domínguez, Javier Cayado, Celia Fernández Loredo o Fran Melero «Frantxu».
Formientu ñació nel añu 2006 dirixida por Inaciu Galán y embaxo la edición de Xareos! y dende entós vien espublizándose con regularidá, axuntando a los escritores más mozos del panorama asturianu d’anguaño. En 2008 Ediciones La Cruz de Grau asumió la xestión editorial de Formientu.
La presentación del númberu cuatro tuvo llugar el sábadu, 3 de xineru, a les cinco la tarde nel I Salón del Llibru Asturianu de Grau y en breves feches seguirá rumbo por otros llugares de Asturies.
