Presentación de Teatru y figures rituales n'Asturies de Antón Caamaño en Les Vegues (Corvera)

              Nel marcu de les actividaes entamaes con motivu del Antroxu, esti miércoles 26 de febrero, a les 18 hores, na Sala d’Arte del Centru Sociocultural de Las Vegas/Les Vegues, va presentase’l llibru Teatru y figures rituales n’Asturies, d’Antón Caamaño. L’actu va contar cola participación del autor, Antón Caamaño, el responsable de la editorial La Cruz de Grado, César Santiago, y el responsable del Serviciu de Normalización Llingüística de Corvera, Rafael Rodríguez Valdés.
Antón Caamaño, actor y director de la compañía teatral Nun Tris, busca con esta obra trazar les llinies qu’unen col correr del tiempu’l nuestru presente coles tradiciones populares, no que fai al teatru, y que permiten analizar la historia del nuestru teatru al traviés del tiempu y la historia d’Asturies al traviés del teatru.
Teatru y figures rituales n’Asturies tenta de facer una aportación dende la disciplina del Arte Dramáticu, calteniendo l’autor que’l Teatru nun ye lliteratura y que los rituales tampoco nun son namás materia d’estudiu de l’Antropoloxía.
Con esti llibru Antón Caamaño busca llamar l’atención sobre esti teatru popular y reivindicalu como ún de los pegoyos del Teatru Asturianu, sorrayando’l sincretismu de les formes paganes col cristianismu como manera de permanencia d’estes representaciones rituales.
Una obra que yá apunta a ser referencia pal estudiu d’espresiones dramátiques propies como les fiestes del Aguilandu, el guirria de San Xuan de Beleño, Os Reises de Tormaleo y El Valledor, o los Sidros y Comedies de Valdesoto.

FUENTE: Página www.biblioasturias.com